1393. November 4. Oberglogau

A.
Wir Ladisla von gots gnadin herczog czu Opul czu Dobrin etc. Tunkunt vnd bekennen offinlich mit desim brife allen die en sehen adir horen lesen, das der ersame vnd andachtige her Niclas Probst vnd vorweser des Clostirs czu Czarnowans an vns brochte vnd vns vorlegete wie die Inwoner vnd gebawir der dorfir des Clostirs Czarnowans in den weigbilden czu Opul vnd czu Glogaw ere Eckir vnd Erbe mit dem se von aldirs aws seyn gesatzet wuste legen lassen vnd bawen wustenunge do von dem Clostir Czinse abgingen, vnd ouch czinse vnsers obirsten Rechtis, des seyn wir czu rate wurden mit vnsern getrewen vnd genczlich obirene komen, vnd wellen das vorbas keyn Inwoner noch gebawir aller dorfir des obgenanten Clostirs vorbasmeer wustenunge bawen sulle, sundir iczlicher seyn eigen erbe, das her hot besessen, erbeten vnd treiben sal bey vnsern furstlichen hulden. Ouch wellen wir das der selben wustenungen keyner vnsir hewptmann zu Glogaw vnd czu Opul noch das Clostir sal gnyssen Sundir das der Probst die selben wustenungen sal awssetczin in gebawir erbe vnd alle freyungen die der selbe Probst gebit den lewten an Czinsen die sullen sie auch haben von vns vnsern erben vnd nochkomen vngehindirt von allen vnsern hewptlewten die iczunt seyn adir seyn werden in czukunftigen czeiten, vnd were sache das ymand aws den egenanten dorfirn des selben Clostirs wedir dis kegenwortige vnser gebot vnd meynunge trebe vnd phlugete vnawsgesaczte wustenungen So sal der probst des obgenanten Clostirs dem wir das mit dis brifes kraft dirlewben und heissen, die selben obirtretir vnsers gebotis bessern an liebe vnd an gute vnd sal das nicht lassen, dowerdir sullen vnser erben vnd nochkomlinge noch keyn hewptmann der obgenanten lande in keyner czeit geseyn mit Worten noch mit werken ane allirley argelist. Mit orkunde dis brifes den wir mit rechtir wissen haben segiln heissen mit vnserm anhanginden Ingesigil, der gegeben ist czu Glogaw am nesten Dinstage noch allirheiligen tage Noch gots gebort dreiczenhundirt Jar vnd in dem dritten vnd Newnczigsten Jare, kegen wortig den Edlen ynsern getrewen mannen hern Vlrich von Falkinhayn Ritter, hern Henczke Domancz Scolastiken czu Glogaw, her Rulande von Pernwald, Jeschke von Laskowicz lantrichter czu Glogaw, Henrich Domancz, Petrasch Stral vnd fil andir erber lewte vnd hern Bernharde von Granowicz dem wir die sachen haben befolen czu schreiben.

B.
Wir Ladissla von gotes gnaden Herczog czu Opul Dobr. etc. Thun kund offinlich vnd bekennen, daz der Ersame vnd geistlichir her Niclas Probist vnd vorweser czu Czarnowans an vns brochte vnd vns vorlegit, wy dy dorflewte vnd gebawer des Clostirs Czarnowans in deme Weygbilde czu Glogaw Ere Ackir vnd Erbe mit deme sie von aldirs aus seyn gesaczczet, wüste legen lassen, vnd bawten wüstenunge, do von dem Clostir czinse abgingen vnd ouch czinse vnsers obirsten rechtis. Des seyn wir czu rate wurden mit vnsern getrawen, vnd des obir eyne komen, vnd wellen daz vorbas keyner eynwoner vnd gebawir der dorffir des egenanten Clostirs wüstenungen bawen sulle, Sundir iczlicher seyn Erbe, daz her hat besessen, erbeten vnd treiben sal, bey vnsern furstlichen holden. Ouch wellen wir, daz der selben wüstenungen noch vnser hauptmann czu Glogaw nach daz Clostir sal genyssen, Sundir daz der Probist dy selben wüstenunge sal aus seczczen in gebawer Erbe vnd alle freyunge dy her gebit den lewten an czinsen, dy sullen sie ouch haben von vns vnd vnsern hauptlewten ane wedir rede. Vnd were sache, daz ymand aus den egenanten Dorffern des selben Clostirs wedir vnser gebot vnd menunge trebe vnd phlügete vnausgesaczte wüstenunge, so sal der Probist des Clostirs deme wir daz mit kraft deses briffes heisen vnd emphelen, dy selben obir treter vnsers gebocz vnd vnser meynunge bessern an leybe vnd an gute, vnd sal daz nicht lassen, do wedir sullen ouch nicht seyn vnser hauptlewte czu Glogaw in keynerley masse. Des czu orkunde vnd grossir sicherheit haben wir vnser Ingesigil an desen briff lassen hengen, der do ist gegeben czu Glogaw, an dem nehesten Dinstage noch allirheiligen tage Noch gotes geburd dreyczenhundert vnd dor nach in deme dritten vnd newczigsten Jare. Do bey waren Dy Edeln vnd wolgeborn ……. ben getrawen, her Vlrich von Falkenhain Ritter, her Reinczke Domancz Scolasticus czu Glogaw ……… and von Perinwalde, Jeschke lantrichter, Henrich Domancz, Petrasch Strolle, vnd vil Andir ……… d her Bernhard von Granowicz, deme wir dy Sachen haben Empholen czu vorschreiben.

Nach zwei Originalen, deren jedes mit demselben Siegel wie No. 59 versehen ist. A ist sorgfältig ingrossirt, auf besserm Pergament, mit breitem Rand, B in unscheinbarer Gestalt mit gewöhnlicher Schrift.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.